Ахьтин руш жедан

Фу чараз течир, ишинна тини,
Акьализ течир хинкІардин чкал;
Чанахъ вуч ятІа, чин тийир сини,
Ацаз чин тийир я гамиш, я кал,
Ахьтин руш жедан дидедихъ лезги!?

НатІуфа, мехкІуьт, хашилани тІач,
Буран кІаневай аш ийиз течир;
Кьурай як, хуьхвер, какадарна хъач,
Афарар чараз авун тавур чир,
Ахьтин руш жедан дидедихъ лезги!?

Дуьшпери, дулма, тІуб чІугур хинкІар,
Гатуз давугъа, цуру нек мили;
Зулун вахтунда кьуруриз якІар,
Гьар са кар фагьум тийидай кьили,
Ахьтин руш жедан дидедихъ лезги!?

Гьар са хуьрекдин, затІарин верцІи,
Кьаз хьайитІа тІвар жедач атІа кьил.
Фирчиндин винел кьуьл ийиз кІарцІи,
Гьар са кар чидай авачир кьве гъил,
Ахьтин руш жедан дидедихъ лезги!?

ТІанурдиз ягъиз, хьарак чараз фу,
Регъверик чІахар, расука течир,
Суфрадал гъидай гьар жуьре къафун,
Кьелни яд авай къапар галачир,
Ахьтин руш жедан дидедихъ лезги!?

КІвалер-къар михьи, дуьзвилин къайда,
Атай мугьманди лугьур аферин;
Артух рахункай авачир файда,
КІантІа шегьердин, кІандатІа хуьруьн,
Ахьтин руш жедан дидедихъ лезги!?

Сажидин, на куьз тІа ийизва кьил?
Ахьтин рушар чахъ хьайид туш ерли!
КІвалахда –зирек, демера шад кьуьл;
Вердишар тавур крариз ферли,
Ахьтин руш жедан дидедихъ лезги!?