Лиедамаш
НОХЧОЛЛА,--
И ю-кх культура,
Нохчочун хат1 кхобун гурахь!
* * *
Шарахь цкъа котамна
Олхазар тарло шех.
Шарахь цкъа болу бах...нуй.
Бакъболчу безамна
Деккъа цкъа болу кхаж...
Шина дагах иккхича суй.
* * *
Дог1учунна д1а а ца луш
Дитинарг, кхоийна,
Цадог1учо, хайрах доккхуш
Д1адаьхьна, лачкъийна.
* * *
Ахь говраш эшайахь, къуьйсуш,
Кхераме яц, хьуна, нуьйраш.
* * *
Х1инццалц ас зу марайихки,
Кхул т1аьхьа и сайна дихки.
* * *
ЦХЬАНА БАХЬАНИНА
Сан метта стихаш ма
Язъехьа, редактор,
Хьайн коч ма юхахьа
Берана сан.
Айхьа ца хаьржинехь
Къахьегна дог дат1ор,
Хийца ма г1ертахьа
Ас тоьхна лан.
* * *
Воьлхучуьнга
Йовлакх кховдадай а...
Дикадарах юха ма кхиета.
АДАМ санна, зиерех
Хьуо чекхваларх,
Хьайна мидал йог1уш ма хиета.
ДОГГ1УЧОХЬ
1иеха а делла, вай
Дегнашна маршо лахь х1инца,
Кхул т1аьхьа хир ду лай
Лохачу,
Дорахчу ирсан.
* * *
Ша цхьамма ца яккхарх б1аьсте,
Ч1ег1ардиго,
Кхоаца дог-ойла хьостий
Виекхаво цо.
* * *
Йо1 йоьду, хан кхаьчча,
Ден-ненан кхерч тосий,
Шен маь1на кхочушдан... ана.
Йо1а, шен ирс хеташ,
Юьхьаралаьцна некъ
Раз-пурх ма тедалахь, нана!
ХЬОМСАРШКА
Самукъа,
Сан тахна даьлла,
Шун саг1адойла!
Мар-мара хьаьвддачохь
Голаш а яьжна,
Вай юха гойла!
* * *
Адамаш делахьара
Сакх-сема жиммал,
1ехор ма дацара
Цхьаьнкхетча, шимма.
* * *
1аьнан де! Ахь гаьллаш
1уьйшур ю меллац?
...Хьо хьанна ц1оьвзар ду
Тхо милла делча?
* * *
Саьмгал ц1ерах санна,
Пхора диканах,
Юдуш догдикалла,
Беха дика нах.
* * *
Ца лаьррийца хилан везаш дирша
Аллачо а: "Дахар-къийсам бу!".
Амма бале долу хилар кирша,
Дерриг маь1на нислахь ма1аш чу.
* * *
Шен г1уллакх ша даран
Лаахь мах бовза,
Кхечуьнан карара
Хи малий хьовса
* *. *
--Къола дина суна яздархоша:
Хаз-хаза дош аьлла боьвлла,
Царах хьуьнар 1овдуш.
--Ма 1ие т1аккха кегош нехаш, кхош а.
Хестош зезаг, ломахь даьлла ,
Луьттуш, хьоьлху,1овраш.
* * *
Кхерамах кхерар,
Доллучух кхерар,
Кхерране ца кхерар,--
И дахар шен меттахь 1иедар!
ДУЬХЕКХИАР
Со виезаш хиллера хьуна.
И хии хьан б1аьра хьаьжча,
И хии хьан юьхь-бос лаьлча,
И хии багара цхьа-ши дош даьлча.
Со виезаш хиллера хьуна.
* * *
К1ожамна, бекъачу, оьшу
Цхьа суй шех ц1ейиллан.
Къонахчунна бахьна оьшу
Шен са боле диллан.
* * *
Дог 1аламат доккха ду,
Амма дерриг хоац цунна чу.
Дегнаш дерриге дилхан ду,
Амма т1улган дегнаш дерш а бу.
* * *
Даймохк!
Хьох лаьцна, ша-башха
Х1ун эр ду ца хууш...
Хьевели со-м.
Ткъа х1инца, дахцадеш д1абоху:
Кхин хаац,
Эшначохь,
Хьуна а тоьпана
Юккъе д1ах1уттур волуш,
Тешаме к1ант ву-кх ХЬАН,
Даймохк!
* * *
Дахаро, цкъа а
Доттаг1ий ца эшшал
Кура ца ваьккхина цхьа а.
Хьайн аьхна аг1о
Д1аоьхьна вахарца
Х1айбате йие хьайна хьанал.
* * *
Дог дет1а,
Пах сенло,
Б1агор а бог1у
Гуш лаьтташ харцойеш йайча.
Хьакъ хета,
Дег1 дайло,
Вела догдог1у
Ша дийннарг оруш и вайча.
* * *
Вардано дажадац стерчий,--
Цо дацадо.
Ткъа собар... зиераш 1еткъийча,
Тарло кхачон.
* * *
Вирера виралла схьадаккха
Ма г1ертий вай?
Ма1ачу къонахчун сий даккхан
Г1ертийша, х1ай!
* * *
Виеза к1ант хьомсаршлахь къаставай
Ма хуьлура неха-м...
Хьогахчу лаамера хьан даге
Ца кхочу хьиехам?
* * *
Цкъаюлий тийналла
Йолу хьех чекх.
Ткъа т1аккха... хьагавой,
Моз до цо шех.
* * *
ЦА ЯЗЛУЧУ ХЕНАХЬ
Мархаш гахь а,
Ерриг стигал яьккхина,
Дог1а-м д1атий,
Ченан хьожа а яьккхина.
Цунах терра
Шу ма хьалхе йийши,
Ойланаш,
Шайл цхьа ирхо ма-ийшши?!
* * *
Лулахойн хьашташа
Стагах пхьар во.
Дикачу адмаша
Дикаллех пхарво.
* * *
Массарах т1ехтилий
Б1аьргашна карориг,
Ялахьа сан хилий,
Собарх со вохалий!
* * *
Пхьарматан ц1е
Кхарстахьа,
Къинош дагош!
Селин хаьштиг,
Кхетахьа,
Куралла 1адош!
* * *
Мел веха латтарх
Хьо х1орда йисттехь,
1емар дац кхахьамие нека.
Лекхчуьра г1аттарх,
Аьрзуна напг1а
Карадац, биенат1е кхиехьан.
* * *
Соьмах духку сий ма эцалахь,
Шай мах берг хьайн дола ца дезахь.
* * *
Соьмаша хьулйац
Йоцу стогалла.
Ткъа къиелло мукъ лац
Гайтан доьналла,
* * *
Тешам юхаэццал ахча а хир дац.
Ямартло юьлуш-ц1анйал хи а хир дац.
* * *
Хьан юьхьт1ехь йоькхана лоьхуш,
Ас б1аьрса дуьйлина латтий.
Хьан юьхьт1е йочана кхоьхьург
Вайшинга иэшалур дац-те..?
* * *
Хийра нехан кхардамера
Къайладаьхьна г1алат,
Айса сайна геч ца дарна
Яь1нит1ера далац.
* * *
Хеттарш сийса
Хан ю жималла.
Жоьпаш кийча
Хилахь къаналлин.
ЦУЬНГА А ХЬАЬЖНА
Хаза ю хьо,
Эхьхетта малх т1ехьаберззал.
Цхьаъ хир ву-кх
Ирс долуш, хьуна ша веззал.
* * *
--Хьо гича ма хазахийти!
--Суначул хаза-м ца хийти!
...Царна юккъе х1оьтти стела1ад
Уьш вовшашка бистхиларна шАт.
* * *
Гергарнах генахь нислуш,
Уллернаш ямарт нислуш,
Ихи денош.
Хьо хьенан мила ву дицлуш,
Стогаллех инзаре мах луш,
Хьийг1и г1иело.
* * *
Нана шеха йогуш дерг
Ма хуьлийла берана!
Хилан луург хуьлийла,
Аьхна долччул, дерина!
* * *
Лерина г1улкхдеш,
Тап-аьлла 1аш верг,--
И ву-кх гуттар
Лиерамна хьакъ верг.
* * *
И хьан б1аьргаш, и ши седа,
Синхаамийн 1аьмнаш хета.
Хьоьсту цара со.
Хийла цаьрга ас сатийси,
Царна чохь ас ирс а лийхи,
Детташ деган кор.
* * *
МУРСТАН УОХЬАМ
Таь1ана-сийна бога
Вайна т1оьхла кхозу...
Хьерсамаш схьакъиеда
Цу чохь жовх1арийн.
Ойла, гила аьрха,
Ц1ингаш кхоьссинчохь,
Дато лан дожийна
Беддда т1епаза байн.
* * *
"Суьпаллех" долун дела
(Ваьшна ма-хьеххара)
Къен дахар хийра дац вайна-м...
Алийша, цхьанделхьа,
Меттиг юй хьехамчаш
Къийбелла,
Долара рицкъа д1адекъна..?
Шаьш байталбаьхча,
Боьвлла-кх уьш баьхна
* * *
Дов-дош а даьстина,
Хьомсарех къаьстина,
1абадеш х1илла,
Лахьтичохь 1илла
Д1аваха-м хала а дацара...
Мил-милла харцтеш а х1уьттуш,
Сан ц1арна диларш т1еюттуш.
Бухабуьсург ца хилча 1уьт1анаш,--
"Кхечеран б1аьргара к1ай" гурш.
...И маршо ца лур ас царна,
Вовшех а... ца бешачарна!
* * *
Дийца меттиг боцуш,
Далхо хьайниг воцуш,
Иэсах хьахаделларш
Ю ца 1уьттуш 1ац-кха...
Кховдорх, ка ца кхочуш,
"Доьг1нехь хир-кх",--бохуш,
Дола ца тиекхийнарш
"Т1аьхьа" кхочур дац-кха...
* * *
Нийса аьлла карийнарш,
Шу ма к1еззиг хили сан.
Дика дечух ас динарш
Довр а ду-кх, хилла чан.
* * *
Суг1анан кан санна
Т1елетча декхар,
Кагбелла хен санна
Т1едоьжча дехар,
Ма дикахьегац-кх вай!
Хьомсарчу доттаг1чух
Ямартло яьлча,
Хьуо виеза моьттинчо
Цавезар оьхьча,
Дуьненан мах хуьлу шай!.
* * *
Адамаллехь хьо ч1аг1лахь,
Адаман дарж доккхур дац
Хьоьгара цхьаммо.
Нагахь хьайх ца йайтахь
Жиргачух 1итта а
Кхоацайен шалго.
* * *
Вай царал а толахь,
Ткъа уьш вайл а толахь,
Тоьлла хир ду дерриг,
Массо декъал хирриг.
* * *
"Иэхьан лай-шен нафсан эла ву"-хезна.
--Хан яг1ахьара цкъа вайх ЭЛИЙ дебна!
* * *
Шинна,
Шаьшша долчу хенахь,
Хиетахь шиннал к1еззиг,
Ма ирс ду и, кхиберш хьеггал,
Бейша, х1ай, уьш декъал !
* * *
Цхьаболчу наха,
Шайн сийлахь хиларе
Хьала а озавой,
Со дарже воккху.
Ткъа вукху наха,
Боьхаллин ц1унала
Бертаза карчавой,
Дохко а воккху
* * *
Шависаран хьармахь
Ду моьттинера
Поэзин бай-латтанаш.
Вахаран къап-къарсах
Дохкуш хиллера
Лиехначу суйн маь1данаш.
* * *
Паччахьан гарантиш,
Инарлин погонаш...
Закъалт дац Делера доцург.
Воцучух ван г1ерташ,
Юха кепаветтарх,
Гучадер дуй цунах доцург..?
* * *
ЭвлаЯАШ бен
Тергал-д1а ца беш,
Араваьлла лелча,
Гезбеш бехха некъ,
Эвла карор ю,
"ЯАШ" карор бац.
Белхий карор бу,
Нислахь дуьзна текх.
* * *
Маьрша вац-кха
Къинойх ц1ена воцург,--
Ма боккха б1о
Т1аьхьабозу цунна!
Ц1ена вац-кха
Хьог1ах маьрша воцург.
Шен 1индаг1 а...
Кхераме ду цунна!
* * *
Баьрччехь товш волчунна
Кхочийла барч.
И ларбан доьналла
Тоьийла цунна.
Ткъа гучадаккхахь цо
Стагвацар ша,
Не1саг1е йолуш ю-кх,--
И хьакъйолчунна!
* * *
Адамалла йоцучара
Эхарта х1ун хьо?..
Адамаллех боьттинчара
Лей, вайна зен до-кх.
* * *
ОЛУШ ХЕЗНАРГ, ТОДИЧА
Син пхьег1а ма яцара
Ас сайна лиехнарг,
Куй лиелон б1арлаг1а яцара.
Къонаха ма вара
Ас Деле виехнарг,-
Г1уда ду-кха суна хьо кхачар!
09: 2007 .
ХЬУНА Х1УН МОЬТТУРА..?
Безам--хьовла ду моьттина яцахь
Кхетар ю хьо нисбаларх и гара.
Конституцин бехкам-бастам бац и,--
Ша ма-барра баккхий вай и баьрчче?..
* * *
Лайна бала, хилла халахетарш
Г1амарт1е д1аязде...
Мохе-малхе шардеш д1адайийтан.
Хьегна дика, хилла хазахетарш
Т1улгат1е ахь язде...
Даиманна иэсехь уьш дисийтан.
* * *
Хьан цхьа-хьайха елайаларх
Хьаьжт1ехь гуллун--итт а!--
"Белхий" д1алур бара ас.
Баккъал хьуна виезаваларх,--
Со хьаьгначу ирсах,
* * *
Свидетельство о публикации №114111904382