БецI

Гьачам гIяяркьана ну арякьурра,
БуцIе лерил пукьа нуни баргира.
Дия холизе дурхIне дергохъурра,
Неш-бецIбегIел нуни кабушира.

Хъули ну вакIира уркIи гъугъале,
БецI кабушес нуни угьура иле.
БуцIа хугил бецI калъун авбукIуле,
УркIилизе хугина дард буциле…

Их дуги бурушла усес кайхьунра,
Савлал бецIла тIамалзакан айзурра.
УркIухъува абзалзе дурархунра,
Гьанна нуни це бирайри абзурра?!

Абзализела хо цаб гьайъализе,
БецIис зат барес итини хIабурар.
Рурси лерри дия, бецIла мякьизе,
ХIяйран! бецIла рачIичу их румхIулрар…

Жанивар дугIла цабил хIабалуле,
РумхIуле руиб ихия рачIичу
Дия тIама дурабушес хIавруле,
КIунтIубе шипIдухъун гъайэс бецIичу.

Суъугьубил ну рурсили кейъиле,
БецI батува ракIиб их нам мякьизе.
ЧIечIале нуни их хъябруцIруциле,
Рурси рати-ну кавша ира бецIизе.

Дардли уркIи бицIибил бецI арбякьун,
Я нам, я дурхIялис зат хIабариле.
БецIла хIулбе гьадика архIядякьун,
Арбякьун итI, хIи урга хIадушиле.

БецIли цуния чIечIадеш гьаргбариб,
Удиле цаби хIабуъни багьахъун.
Дия варгина жан-рурси мяштрариб,
Их багьандан дардра-цабра арбякьун.

ХIи душес цабри их намке бакIибил,
Амма нушаке цIахдизун ихия,
Аргъахъиб намзе дия цIаххIадизунил,
Хъалибарг кабуршухIале цуния...