Факир

СымыпIащIэу къыщызокIухьыр
Бахъсэн псыхъуэ.
ИкIи къызолъагъужыр
ЗгъэщIэгъуэжу,
Япэми хуэдэу дыгъэ бзийр
           къахуэпшэкIухьу
ЩIалэ цIыкIуитI мэджэгури
            хэсщ пшахъуэм.
                Керим Отаров.
Псы къыгуэжыр зэпысчауэ
Пшахъуэ хуабэм сыщыхэсым,
Си зэчийм гу къылъитауэ,
ЛIы мыцIыхур щыму къаплъэрт.
А зэманым сыкъамыщIэу
Бахъсэныжь сэ сыкIуэрейт,
Пшэхэм жьауэ кърагъэщIымэ,
Мывэ иныр си шэнтжьейт.
Си пщэм къэсу псым сыхэту,
Жьэгъур сIыгъыу сыщекIуэкIым,
ПщIантIэм щэхуу сыдэкIауэ
Сыдэджэгуу арт ажалым.
Зы лъэбакъуэ иримыкъукIэ
Лейуэ бгъукIэ сыбэкъуамэ,
Хъырц сымыщIэуэ есыкIэ
Пхъэ къуэщIийуэ сихьт архъуанэм.
Арат джэгум фIыуэ хэлъыр,
НэгъуэщIкIэ дауэ лIы ухъунт?
Псыхъуэгуащэм и лъыр къэплъу,
ГуIэу, гызу дыIэщIэкIт.
Пшахъуэ псыфым хьэрфхэр къистхъэу
Зэзэмызэ сэ сытеут,
Щытагъэнщ зыгуэр суцIырхъыу
Згъуэтыжыну сэ щыхьэт.

2

Махуэ гъакIуэу Бахъсэн псыхъуэм,
СыкIуэсауэ сыздыдэсым
Си анэшхуэр пщафIэм къасщIэрт,
Ауи ищIытэкъым шхын IэфI!
Нурэ гъейхэм сабиибл
Сакъатыншэу хипIыкIат.
Куэдым жаIэрт ар хьэлэлу,
ЖиIэрт и адэр кулакау.
Бахъсэныжь и ущэ макъым
Ар щIэдэIуурэ къэхъуат,
ТIууэ зэтета я унэр
Абджыпс къабзэуэ щытат.
Совет властым нэмыщIам
Нэрылъагъуу ар щытынт,
КъатитIу зэтета унэшхуэм,
Таурыхъ куэд щызэхэсхынт.
Былымаблэу щыта Уетхэ
Къулайягъэм текIуэдащ,
Унэр зэу ирахри,
Бгъэныщхьэжьым къыщIэнащ.
Си анэшхуэм и Iущ псалъэ
Нобэм къэси къысхуэнащ:
ЦIыху гуащIафIэм гъащIэфI иIэщ,
Щхьэхыр псынщIэу унэхъунщ.
                3
Си адэшым я амбархэр
 Нобэ къэси щIэтщ си нэгу,
Бахъсэн псыхъуэм сыщыдэсым
И пкъыр быдэу зэфIэтащ.
Си адэшхуэр нанэ ещэу,
А амбархэм къуэтагъэнт.
Псы къихьыну дэкIа пщащэр,
Пшыхьым хуэзэу къипхъуэтащ.
Джэду и къуэ дзыгъуащэщ,
Хьисэ ещхь сэ сыхъужащ,
Псы дашар я пщIантIэм щижу,
Блэр и гъуэмбым къисшыфащ.
                4
Дыгъэ бзийр къытхуэпшэкIухьу,
Пшахъуэ хуабэм дыщыхэсым,
И блэкIам тепыхьэу щэхуу,
ЛIы мыцIыхур къаплъэу пIэрэт?
                5
Адэ-анэм сэ сафIэкIри
Нани дади и гугъу сщIащ,
Дунеишхуэм
Бегъымбару тета Мэдэ,
Сэ щыуагъэр сIэщIэкIами,
ЗэкIэ къысхуэгъэгъу!