ГIямрула мягIна

«Се сари гIямру?»- суал бедалли,
Азирти жавабти аргъес вираргу:
Ца адамли иру: «МицIирдеш сари».
ЦархIил лехIизурли, халкь чебиахъу.

Адамли гIямрула мягIна чебиу
БурхIназир, дуркIути иш дунъяличир,
Яра сунени гIямрула гьуйчиб
Кайсуси кеплизиб, разидешлизиб.

Ил суайс жаваб чарбатес гьалар
Жагьси хьунул адам пикрирухъалли,
Иру саби или гIямрула кьадри
ВиштIаси дурхIяла дукелцIилизиб.

Ахърила вегIли илгъуна суайс
Жаваб хIелуга,къакъгьавли калзан,
Амма лехIахъалра багьесли бирар
ГIямру илис давла, мургьи-арц диъни.

ГIямрула лусенти чедидяхъибси
Ухънани дамсурти някъби суркдиру,
Иру: «УркIилизир хIялалдеш дихIни –
Илизиб чебиис гIямрула кьадри».

ГIямрула гьундури тамандиубли
БебкIала майъали кIапIварибсили
Гьигьбалта: «ГIямрула мягIна багьесцад
ХIериэс хIетурра кьудратла вегIли.

ВиштIахIели наб гIямрула кьадри
Нешла малхIямти дяхI-някълизибри.
ЖагьхIели карцIайла дуцIар дугьбани
Дунъя шалабири, мягIничеббири.

Хъалибаргла вегI ветаурхIели
Кулпетлизиб сабри гIямрула тIягIям.
Набзибад алкIути биштIати дурхIни
Ну талихIчевварес лябкьутин билзи.

Ца гьигьла манзилван дусми ардякьун,
Ахирла хIябкьяйчив вагьариубра,
Камсилра гьатIи хIериэс биалри –
Нуни иш гIямрула мягIна баласи.»