Гюзель Гасанова вахаз

Квез багъишдай гуьзел гафар мад ава,
Захъ а ч1алар лигимардай чад ава.
Зи шииррихъ Земзем булах яд ава,
Гьахьтинбур квез за багъишда, Гюзель вах!
....
Вуч лугьун за Гюзель вахаз?
Урус чІалал чидай рахаз.
Зун амукьна гьакІ кьил чухваз,
Переводар акур чІавуз.

Аферин я квез къвезвай гаф,
И кьадардин авай инсаф.
Заз кІанзава мадни гзаф,
Хкаж хьана куьн тик цавуз.

Сажидин я келле чІуру,
ЧІар алачиз хуьзвай чуру.
Пехил ятІан бязибуру,
Гъизва вилик эрекь, савуз!
+++
За гьиснай куьн чи патарин са лиф я.
Заз чида, ваз къурбатда хьун гьайиф я.
Ви патав вуж хьайитІани зайиф я,
Куьз лагьайтІа, вун са цуьк я, Гюзель вах!

Заз чир хьана, вун Самурдин са къуш я.
Заз ви акун, ви кьатІунар лап хуш я.
Бахтлу касдин - свас, бахтлудан са руш я.
Куьз лагьайтІа, вун са рикІ я, Гюзель руш!

Сажидиназ гунагь тахьуй чІаларин,
Атир галай, шабалутдин чІарарин.
Ачух тир чин, хъуькъвен кьилер ярарин,
Куьз лагьайтІа, дуьз гьа икІ я, Гюзель руш!
…...
Инсан ава ватандивай яргъа тир,
Амма адан рикІ амазма Ватанда.
Зи шивни, вах, са чІавара юргъ тир,
Шииратдин зарбвал ама зи чанда.

Са заз туш кьван дуьнья яратмишайди,
Тек са заз кІанз къулайвилер, бахтарни.
Са зун туш кьван гьар са кар артмишайди,
Заз кІанивал жез йисан кьуд вахтарни.

Сад Аллагьди гайи йикъал рази я,
Артуханди кІан хьуналди жагъидач?
Руьгьдиз жегьил, яшариз зун кьуьзуь я,
Лугьуналди, зун ажалсуз рекьидач.

Гьар са касдиз бахшнавай са вахт ава.
Гьар йикъакай менфят къачуз алахъа.
Вун инсан яз халкь авунихъ бахт ава,
Гъилерални, кьилелдини кІвалаха!
…..
Гьуьрметлу вах, Гюзель лугьур тІвар алай,
Вакай заз са кьилин жуьре вах хьана.
Заз кІанзава ви уьмуьрда зар алай,
Яргъи уьмуьр, сагъламвилин Бахт хьана.

Сажидин я, есир хьанвай чІаларин,
Зун дуьньядал ашукь хьанвай шаир я.
Къизил гуьлдин цуьк тир цацар-валарин,
Зи Гуьзел вах, переводрин магьир я!
....
Тахсиррилай гъил къачу зи,
ГъалатІарни квачиз туш зак.
Гунагь кватІа, кьил къачу зи,
Дердер, гъамар гвачиз туш заг.

РикІ ахъайна, ачух суьгьбет,
Ийидай вахт захъни авач.
Лугьуналди вири, гьелбет,
Я заз гудай гьахъни авач.

Жува жуван рикІиз майдан,
Гузва, вах, за чІаларалди.
Алцумзава шуькІуь гардан,
Спичкадин кьаларалди.

Хабар кьада, ваз муьгьуьббат,
Вуч затІ ятІа, чир хьайид ян?
Адан цІай квай цІукІ-мусибат,
Галукь тавур пІир хьайид ян?

Бес Сажидин къе и йикъал,
КІарабрин гъаб квевай я хьун?
РикІи къачуз хуруда къал,
Югъ-къандивай жезва яхун.