Баллада Унра Зазай

   Уршилике бебкIарала иза агиле хIябал дус дурар, уршили цуния нешизе тиладибируле цай, изалис дарман баргахъесана.

-УкIус хIазе тилади,
Дия дурхъай неш гьаман.
БяхIбарагъа умцIери ,
Изалис баргес дарман.

    Нешли уршила гъайс жаваб ишхъуна луга гьар замайзе:

-ХIябал дусли умцIуле,
Лебил дунъя жирбариб.
Пашманле чарбулхъуле,
ХIатI дарман баргхIабаргиб.


   Унралике их уршила дигахъуй рурси руиле руъар Зазай букIуй. Цай тяйди икайкем их кераэс дигахъуле, дарма мелизе их халрариле, нешизе укIуле цай: «Гьачам аррякьува Зазая узбани ихтияр гале, гатагъа Зазай бегIарагъала кераэс» иле.

-Тилади бирис хIазе
Ишбари, неш дурхъай…
Вярарагъа мякьизе,
Нушия унра Зазай.

-Нуничи итI вяририс,
Дия ахIарил урши.
Узбала ихтиялис,
Це буришатIи нуни?!

   Зазая узбазе цари хьарбигъуй тиладиличу.

Ишбари ну ракIира,
ХIушазе тиладибарес…
Тазале цаб уркIира,
Зазай намчу ряхIрарес.

   Узбани ихтияр бариб рузи ряхIрарес, амма чаррариле ряхIрарибилана рагъяхъесла хъули. Уршила нешли лерилана ригъахъахIа иле буриб.

-Рузи ратур игъахIа,
Дурхъай унра хIа хайзе.
-Зазай чарра рирахIа,
Цуния лерил хIяйзе.

Зазай гатиле намчу,
Нуни унза абхьира.
Аррякьува ихтиличу
Урши, Зазай гатира.

   Зазайни их урши бурушизе кейъиб, хIял-хIукму хьардигъуле рехIракIиб. Рурсила суалтис уршили жавабт лугиб.

-Гьаннара бурушизе,
Дия унра цайрира?!
Хьарбягъиле узбазе,
ХIатI мякьизе ракIира.


-ХIатI хугина баркалла,
Нам мякьизе ракIнилис,
Кьадар  цаби Аллагьла,
Иш иза нам гибнилис.

    Цалзе ца дурутера дегъуле арагъа, рурси хъули аррякьун. Уршили цай дуниялзакан варсугьес заман бягъинира багьува, неш дудеш гIяхIле калэная иле цIакьле паная гъай дурадухъахъун.

-Неш, хIу гIяхIле калъабри,
Дудеш, хIура ватабри.
-ГIядабле гьигьукIуле,
Тяйдидеш кецIбиркулри.

БебкIали их уцайкем,
Бикиб унра кераэс.
Чархизе хIал битIайкем,
Унралис баркалла гес.

    Их эбкIиб дахъол кахIалъува, Зазай гьабари хIябразе рашуле, рисуле, риртуле калъун цIелда пIайбируле, хъябруцIбурцуле. Унра хъумартес хIаругьуб.