Тик гуьнейрин эк1я хьанвай ценерив,
Зарб вац1арин ци чуьхуьзвай синерив,
Шегьре рекьив ц1иргъ кутунвай к1валерив,
Дамахариз дигай хуьр я, Цмурар!
Гележегдин несил тербии ийизвай,
Хайи чил хуьз чанар гьайиф тийизвай,
Тарих багьа къагьриманар диризвай,
Куьре патаз дигай хуьр я, Цмурар!
Кьилер рехи ава ина алимар,
Къазанмишай ч1ехи т1варар гьакимар,
Генералар, ийизва за тагькимар,
Кьегьалариз дигай хуьр я, Цмурар!
Сурни кьисмет тахьай хайи накьвариз,
Хва- шаирди тесниф авур ч1алариз,
Вафалу тир ялавлу пак ц1арариз,
Ватандашриз дигай хуьр я, Цмурар!
Манидин сес мад чк1анва дереда,
Ахмиш хьанва эллер гатфар береда,
Мярекатар башламишиз вядеда-
Шад хабарриз дигай хуьр я, Цмурар!
май 2014
Цмурар
© Copyright: Джарият Магомедова, 2014
Свидетельство о публикации №114072305816
Свидетельство о публикации №114072305816
Рецензии