Садбур жеда

Садбур жеда инсан жакьваз, кIараб хьиз,
Чпелай кар алакь тавур береда.
Са-садбуру кьада а кас араб хьиз,
Лезги хва яз хайиди тир Куьреда.
Чир жедайвал, жаваб гун са гафунал:
Кар авачиз жуван тариф ийичир.
Яд алцумиз чидай чIарчIин сафунал,
Ам Сажидин я квез чидай, тийижир!

Агь, адан тIвар кьан тийизвай кас авач,
Сада – сагърай, са шумуда – кьий лугьуз.
А кесибдиз хъел атунни хас авач,
Сад Аллагьди саламат яз хуьн патал.
Чир жедайвал, жаваб гун са гафунал.
Вуч кIантIани лугьуз гафар ийичир.
Югъди халкьдихъ тух тежедай рахунал,
Ам Сажидин я квез чидай, тийижир!

Карван физва, гурцIул кIевиз элукькьиз,
Дуьнья я кьван, гьардаз вич гьахъ аквадай.
Сада тариф, сада дабан эгъуьниз,
Гъуьлягъри хьиз цIар чIугвазва руквадай.
Чир жедайвал, жаваб гун са гафунал,
Са кIвалах кьвед-пуд сеферда хъийичир.
РикI алай кас крар вилик тухунал,
Ам Сажидин я квез чидай, тийижир!

Гунагь квачир кас сад ава – Аллагь я.
Гъил къачурай ялвардай гьар са касдин.
Лугьуда ам муьгьуьббатдин жерягь я,
Кар туькIуьрдай гайи гьар са наказдин.
Чир жедайвал, жаваб гун са гафунал,
Са чIавузни вичел дамах ийичир.
Туьнт кьуьл ийиз чидай канаб рухунал,
Ам Сажидин я квез чидай, тийижир!

Гьар вуч ятIан, пис-хъсан зун шаир я.
КIелиз кIандай касди кIелиз, манийрихъ
Яб акалуй, я эвел, я эхир я.
Гьар жуьре вирт жеда гьар са куьнуьйрихъ.
Чир жедайвал, жаваб гун са гафунал,
Вилик вегьей кам кьулуьхъди ийичир.
Ашукь кас я «НуькI-халадин» махунал.
Ам Сажидин я квез чидай, тийижир!