Чилер пайзава

Заз ван хьайивал, чилер пайзава!
Гьар са чIехида вичиз кIанивал.
Гъуьлуьни папа - кIвалер пайзава!
Чпин араяр жизви къайивал.

Кьве стхади са шалвар пайзава!
КьелитIри кIвалин къавар пайзава!
Заз ван хьайивал, малар пайзава!
Ферма чукIуриз, гъиляй атайвал.

Садбуру гафар-чIалар пайзава!
Пелтек мез авай сивяй атайвал.
Миллетри - гьуьлер, накьвар пайзава!
Садбуру вилин накъвар пайзава!

Заз ван хьайивал, пулар пайзава!
Кьаз, ягъиз-рекьиз, гъиле гьатайвал.
Гатар пайзава, зулар пайзава!
ШейтIандин фикир кьиле гьатайвал.

Танкар пайзава, тупар пайзава!
Кьейи жегьилрин папар пайзава!
Заз ван хьайивал, чуьруьк пайзава!
Иблис инсанри рикIиз кIанивал.

КIвалерик квай цIай - хуьруьк кяйзава!
Тахсир квачир халкь рекьиз кIанивал.
Гьар сада вичиз гъуьлер пайзава!
Сада манияр, кьуьлер пайзава!

Заз ван хьайивал, вири пайзава!
Къуни-кьуншияр терг авун патал.
Зегьерлу эрекь, гъери пайзава!
Садаз-сад - чичIек, серг авун патал.
За Аллагь патал ялвар пайзава!
Сада зи кьилел - цавар пайзава!