Зи муьгьуьббат

Муьгьуьббат зи цIай тир хкахь тийидай,
Гъамаривай ийиз тахьай бамишар.
Муьгьуьббат зи гьуьл тир алахь тийидай,
Дегишариз тахьай вичин еришар,
Чилкин вирик стIал акахь тийидай.

Сел хьиз фена уьмуьр вацIун кьер кьуна,
Муьгьуьббат хуьз алахънай зун саламат.
ЦIув кайи кьван пIузарри зи хер кьуна,
Акун тавур амач хьи заз аламат.
Къвез зи вилик, гагь гапур, гагь пер кьуна.

Аламайди муьгьуьббатдин чан я зал,
РикIел хкиз ярди гайи теменар.
Залум кьисмет – илис хьанвай къван я зал.
Муьгьуьббатдин кьилел вегьез кеменар,
Хъуьрей душман пачагь течир хан я зал!

Са акьван вахт амач мугьманвиле заз,
Эхиратдиз гьатда мукьвал рекье зун.
Кьве виликай сад шез пашманвиле заз,
Тваз алахъна шумудни сад йикье зун.
Дердер кьисмет хьана душманвиле заз!

Ам Сажидин тушиз масад хьанайтIа,
Куьне кьуьлер ийидай зарб макьадал.
Заз хьиз, квезни Сад Аллагьди ганайтIа,
Куьнни зун хьиз амукьдай и макьамдал.
Зун хьиз шаир яз дидеди ханайтIа!