Мирзе никIин, булах къайи яд авай,
АрхитIрин хуьр-къеле ялда ад авай.
Ина мани ягъиз чидай сад авай,
Адан тIварни я лугьуда Зульфия!
Манидарар лезгийрихъ чи бул ава,
Гьисабна хьуй - чIижерин са кул ава.
Амма садахъ сес – къизилдин зул ава,
Адан тIварни я лугьуда Зульфия!
Мани лугьур чIавуз адаз яб гана,
Акъваз жеда, азиятдиз таб гана.
Садаз ширин сес-виртIедин къаб гана,
Адан тIварни я лугьуда Зульфия!
Кьадар-кьисмет хьана Ахцегь – Самурдиз,
Заз Хуьруьга я ам сифте акурди.
Са зун туш кьван мани рикIи чIугурди,
Адан тIварни я лугьуда Зульфия!
Я Сажидин, гьикьван хьурай тарифар?
Чахъ мад ава манидарар-арифар.
Са кIвал ама вун тавунвай илифар,
Адан тIварни я лугьуда Зульфия!
Зульфия
© Copyright: Сажидин Саидгасанов 4, 2014
Свидетельство о публикации №114060605245
Свидетельство о публикации №114060605245
Рецензии