Диана

Новороссийск – игит шегьерда, СтIал Сулейманан 145 йисаз талукьарна, мемориальный доска ачухдайла, шад мярекат тухунин рагьбер хьайи чи лезги хва, Краснодар крайда администрациядин кьилин заместитель,  ДР Полномочный Представитель  ИБРАГИМОВ РУСЛАН АЛИЕВИЧА чIугур зегьметдай, за адан гъвечIи Диана рушаз ихьтин шиир бахшналди, пара кьван сагърай лугьузва.
 
Шабалутдин бурма чIарар къизилдин,
Таз тараллай цуьк ятIа вун гуьгьуьлдин?
Шегьерда шад сесер тунвай билбилдин,
Муштулух гвай хабар ятIа, Диана?
Беневшайрин гьамбар ятIа, Диана?

Дагъни Аран бегьер таран ширин тир,
Играми руш вич Къурушрин хъуьруьн тир.
Бахтлу рекье гелер тадай дерин тир,
Муштулух гвай хабар ятIа, Диана?
Беневшайрин гьамбар ятIа, Диана?

Лезги чилин берекатрин берекат,
Вун ятIа чак кутазвайди гьерекат?
Шад межлисрик къурмишнавай мярекат,
Муштулух гвай хабар ятIа, Диана?
Беневшайрин гьамбар ятIа, Диана?

Сажидина туькIуьрна ваз чIал ширин,
Бахтлу хьунухь паталди куьн кIвал, ширин.
Хабар кьадай гьикI ятIа зи гьал, ширин,
Муштулух гвай хабар ятIа, Диана?
Беневшайрин гьамбар ятIа, Диана?