***

Бархleхъла дягlли хlела 
Бархиб чяхl-чяхlи гъезла, 
Дазу ва мягlна аги 
Хlези дила гъай-мезла.
 
Тlaма руржулри, тилла 
Гимиван янилизир, 
Гlурра гlела гlебшнила 
Хъябшлири хъянилизив. 

Хlу лехlкахъилри хlерли, 
Кlунтlбачил пишдяхъибти, 
Дебшилри заккад къургъи 
Бугlярдешли деркlибти. 

Дягlлиуб хlела гъезла 
Цlудар дугиван, хlера, 
Дархиб пикруми, набчи 
Чедихьи децlла вера: 

- Ишкlун мехlурличирван, 
Дукаркlули сар набчир, 
Къунзрухъес ракlибси сар 
Бархlехъла гьаваличир... 

Хlерличил хlер белчlиван, 
Хlера, хlу тlашризурри. 
Дисути гlела гlебшни 
Хlебличи шурдатурри. 

Чардулхъуливан бизур 
Мисрила къуймур чатlни, 
Хапли уркlи хlулбачил 
Бурили хlуни къантlли.
 
Илди хlулбази карцlли 
Ацlира урхьназиван, 
Ва илав ветахъира 
Бекlлил дакlухlевхъесван. 

Агь, ну ацlибси улка - 
Сихlрула тамашала, 
Ухуси дуги-бархlи 
Берхlи кlелра нушала. 

Хlеб тlемдикlар - чиллала 
Дугурбазирра илар, 
Гьар гlяшикьлис дигайла 
Сунна уръира ухар.