Вил ахъайда, кьуд патахъай акваз гьарам,
Халкьди кьуьлиз шейт1андини гатаз далдам,
Стхади къе стхадилай хут1азва хам,
Фана дуьнья, ви суьрет лап алчах я хьи.
Залум хциз хайи диде душман хьанва,
Дуьньядикай ц1аю кайи бустан хьанва,
Инсандин рик1, шейт1андиз хуш макан хьанва,
Фана дуьнья, вун тапарин булах я хьи.
Аквазва къе сифте жибин, ахпа инсан,
Кесибдилай девлетлуди рик1из масан,
Алукьнава эхиз тежер четин заман,
Фана дуьнья, вун рик1 паддай къармах я хьи.
Акьулсузриз ахъайзава илимрин багъ,
Халкьдихъ рик1 кур алимрин муг, мич1и дустагъ,
Кьунва ч1улав цифери чи кьилеллай рагъ,
Фана дуьнья, вун Иблисдин пайдах я хьи.
Фана дуьнья, вун Иблисдин пайдах я хьи
© Copyright: Сулейман Ахтынский, 2014
Свидетельство о публикации №114041905136
Свидетельство о публикации №114041905136
Рецензии