Галукьна захъ залан хабар:
Агакьна-зал залан хабар,
Алудна зи рикIел хабар,
Лап стхадив тир барабар,
Абдулбари дуст кьена зи.
Шумуд йисуз санал кIвалах
Авурди тир, хьухь зи чIалах?
Лезги чIалан земзем булах,
Абдулбари дуст кьена зи!
Халкь паталди чIугур зегьмет,
Адалатдин алай рагьмет,
Къазанмишай еке гьуьрмет,
Абдулбари дуст кьена зи!
Тек-тек жеда ихьтин ксар,
Уьмуьр патал гайи йисар,
Халкьдиз багъиш авур тарсар.
Абдулбари дуст кьена зи!
1-апрелдиз, лезги халкьдин эдебиятда дерин гел тур, РФ ва Лезги писателрин союзрин член, писател, журналист, драматург Абдулбари Агьмедович Магьмудов рагьметдиз фена, 2- апрелдиз эхиратдин кIвализ рекье туна. И шиирдин келимаяр за ам кучуддай чкадал кIелна. Идахъ галаз сад хьиз, за дуст Абдулбаридин хизандиз, мукьвабуруз ва Адан яратмишунрал ашукь инсанриз, дерин хажалат чIугунив, башсагълугъвал гузва. Къуй, Вичиз рагьмет хьурай!
Абдулбари дуст кьена зи
© Copyright: Сажидин Саидгасанов 4, 2014
Свидетельство о публикации №114040206619
Свидетельство о публикации №114040206619
Рецензии