С-Мислимат. Зи дуьнья

                СтIал Мислимат
Зи дуьнья

               ***
Дуьнья, дуьнья, вун чи уьмуьр, иман я,
Гьар дердинин дарман, духтур, лукьман я.
Яратмишна Сад Аллагьди лукIвар яз,
Вунани чи кеф хамир, ваз аман я.

               ***
Чир хьухь, инсан, кам вегьена къекъвей чил,
Рази тушиз тамир вуна жувакай.
Вахъ ви нефес амай кьадар гелкъвей чил
Кака хьиз хуьх на ачкардин лувак квай.

               ***
Сад яз кIанда  хияларни кIвалахар.
Са жув патал хьайид туш зун дидедиз.
Гзаф хуш я заз гъилерин дамахар,
Аманатар тун паталди дуьньядиз.

               ***
ЭлкъвейтIани беден куьлуь накьвадиз,
Акур кас, заз баркалла гуз, рахурай.
Къе физвай югъ гьахьдай чIавуз пакадиз,
Ериндайни зи хуш сифет акурай.

                ***
Гуьгъуьниз ви гатфарин рагъ илифда,
Жува кутур цилинкай таз хьайила.
ХайитIа ам, лап велед кьван гьайифда,
Шад жеда рикI ада бегьер гайила.

                ***
Килиг тийиз алатзавай яшариз,
Вуч ава чахъ чи фикирдал туькIуьрай.
Жедачирни чавай алмас къашар хьиз,
Экв тунайтIа чи утагъда куькIуьрай.

                ***                ***
Жери чIавуз, шив ятIа вун лувар квай,
Гьуьрметда ваз ви алатай яшари.
Кьада ви гел, асланри хьиз гьунар квай,
Ви несилдал гадайрини рушари.

                ***
Агъзур-агъзур йисар чилин хьайитIан,
Гьава амаз, дуьнья кьуьзуь жерид туш.
Агъзур жуьре майва Чили гъайитIан,
Кьве жуьре сад-садаз ухшар хьайид туш.

                ***
Экуьн ярар чи пенжерда акьурла,
Кьезил шагьвар, аял хьиз, зав къугъвазва.
Пеле бириш, чIарар рехиз акурла,
Жегьилвили завай кьулухъ чIугвазва…