СтIал МИСЛИАТ
АЗАРЛУ ВАТАН
Вучиз ргазва, тIач хьиз, ви иви?
Вучиз хьанватIа азарлу ватан?
Ни гьисабзавач гъалибвилер ви?
Вун хьанва михьиз базарлу ватан.
Туьгьметун амач чIуру крариз,
Гьар сад хьанва вич-вичин иеси.
Садбур акьахиз кьакьан кIарариз,
Амайбур жезва къвердавай аси.
Я кIвалах амач, я ийидай кар,
Къуватсуз хьана, буш хьанва гъилер.
ХьайитIа вучда ризкьиндикай дар?
Къалгъанри кьунва бегьердин никIер.
АлукIиз чизмач лежбердиз шалам,
Алкашдал - чекме, дабанар къацу…
Дидеди гузмач я аялдиз мам,
АтIуда лугьуз чинин ранг лацу.
КIвалах хьанва ви цIуд гуз, кIуьд къачун,
ТIварни эцигна – базарлу ватан.
Гьи кьадар хьурай ваз тамашиз чун,
Мус сагъ жеда вун, азарлу ватан?!
СтIал. Мислимат. Азарлу ватан
© Copyright: Ахмедпаша Ахмедпашаев, 2014
Свидетельство о публикации №114030409332
Свидетельство о публикации №114030409332
Рецензии