Шад манийрик кутаз лувар,
Къурмишда на гьар са сувар.
Ашукьардай чилер-цавар,
Аламатдин затI я чуьнгуьр!
Хъуьрез-къугъваз гимиш симер,
Тезенагдал кутаз демер,
Шив хьиз вердиш, ийиз туьмер,
Аламатдин затI я чуьнгуьр!
Лезги халкьдин мел-мехъерин,
Шагьларин шагь я мелерин.
Руьгь кутадай рикIик дерин,
Аламатдин затI я чуьнгуьр!
ЦIийи свас хьиз чамран хурал,
Рахада вун ич хьиз тарал.
Лезги чилел ашукь марал,
Аламатдин затI я чуьнгуьр!
Сажидин, на чIалар туькIуьр,
Шагьнабатдин яд я чунгуьр.
Сад Аллагьди авур куькIуьр,
Аламатдин затI я чуьнгуьр!
Лезги чуьнгуьр
© Copyright: Сажидин Саидгасанов, 2014
Свидетельство о публикации №114010103694
Свидетельство о публикации №114010103694
Рецензии