Эхиримжи тIалабун

Сафуниз тешпигь авуна беден,
Хтана къунши женгерай къати;
Гьар хирел адан медални орден,
Алаз кIевнавай хурудин кьвати.
Хтана хуьруьз, ийиз кIанз кIвалах,
Алахъна къунши колхозда вичин,
Акун тавур кас жедач зи чIалахъ,
Женг давам хъийиз хьанвай ам кIвачин.

Мягьледал са руш алай вил алаз,
Буйдизни гуьзел, цIемуьжуьд яшан.
Гададин диде адал гъил алаз,
Кутаз кIанзавай са гъвечIи лишан.
Гададал гьеле аламай хирер,
Арабир чIуриз дидедин хъуьруьн.
Дяведи сефил авунвай хуьрер,
АкIажарнавай гъамарик дерин.

Хирерик залан, кьисметдиз туькьуьл,
МуьтIуьгъ жезвачир, ялавлу аскер.
Ачух ийиз кIанз гададин гуьгьуьл,
Алахъна диде, мез ийиз шекер.
Гьал хъсан акур вахтунда хцин,
Мехъеркай диде эгечIна рахаз..
Чизвачир адаз ажалди къецин,
Тухудайди хва вичивай яргъаз.

Лишанлу тир свас мехъерин йикъал
Вил алаз авай, къе-пака лугьуз.
Дидедин рикIе къурмиш хьана къал,
Къурху тир вич хьун хцихъай ялгъуз.
Гададин рикIик акатна гъалаб,
На лугьун адан кIаник ква балкIан!
Вичив яракь гун авурла тIалаб,
Дидедиз къурху ва хьана дакIан.

Хкаж хьана хва миселай вичин,
Шашка гъилеваз женгчидин саягъ.
Душмандал вигьин хъийиз кIанз кIвачин,
«Виликди, дустар!»-авуна гьарагъ.
АтIана михьиз дидедин чара,
Це лагьай сусаз эверна кIвализ.
РикIи вич кукIвар ийизвай хура,
Дуьнья мичIи яз экуь кьве вилиз.

Пайдах хьиз яру къекъифай рангар,
Ягъай адан чин дере хьанвай ал.
Хурун кьефесдин къати хьана гар,
Гьулдандин рикIи худда тунвай къал.
КIвалин са пата мехъерин затIар,
Пекдин лацу шал, шатландка парча.
Мехъерин йикъал алачтIани тIвар,
Кьарай кьазвачир це лагьай руша.

Гуя ам авай дустарин юкьва,
БалкIандал вичин, душманрихъ кикIиз.
Эхир жедай югъ атанвай мукьва,
Низ кIан жеда кьван икьван фад рекьиз!?
Це лагьай сусан гуьзел тир къамат,
Зайиф аквазвай адаз вилерай.
ТIем акакь тийир тушни зулумат?
Акъатзавайла дуьнья гъилерай.

Терг хьурай дяве, пеле авай къан,
Цуьк хьтин жегьил ийизвай чара!
Гьелелиг хицел аламазмай чан,
Жигерри нефес дар къачуз хура.
Эхиримжи яз авуна тIалаб:
Яракь гун вичив ва балкIан юргъа.
Гьикьван мурадар аматIа яраб,
Ажалди гада чIугвазва лавгъа.

Терг хьура дяве,кьиникьин сегьне,
Дуьнья чIур ийиз авунвыай алахъ.
Дидейрин рикIе хирер таз дегьне,
Терсина патахъ ийизвай кIвалах.
Кьегьел хьиз фена, эхирдин рекьиз,
Гъалибвал къачуз душмандин винел!
Гьич са касдизни кIан туш хьи рекьиз,
Вири мурадар аламаз Чилел!