Алай вахтунин хуьрерин агьалийрин шикилар

- Сиражидин, чан хва, малар пака вуна чуьлдиз тухвана к1анда, зунни дах экуьнахъ фад  шегьердиз физва.
- Ваъ, завай тухуз жедач.
 - Вучиз, чан хва?
- Ваз зал хъуьрена к1анзавани,я диде?
- Вуж хъуьреда, квел хъуьреда, я хва?
- Я чи куьчеда яшамиш жезвайбуру, я зи дустарин хзанри садани малар хуьзмач.
  Малар гваз физ акурт1а абур вири зал хъуьреда.


- Алимурад, мобилник эциг.Тарсар ая.
- Чан хва, дивиди хкуд, ша заз ви куьмек герек я.
- Компьютордихъ геждалди ацукьун чандиз зарар я. Къарагъ, ша салаз фин, пер яна к1анда.
Дидедини бубадин ихьтин буюрмишунрикай куьц1енвай хци лугьузва:
-Пагь, гьиниз фида квекай? Бахтаварар я Магьмудни Гьажибала, диде - бубаяр патарал къазанмишиз фенвай!Югъди-йифди чпин эхтиярда ава. Я к1валах авач, я кеспи.

 Эвелан багълар, ник1ер пайнава. Гьарда вичивай жедайвал салара к1валер эцигнава, эцигзава, къелемар ак1урзава, майваяр цазва.
Са акьван гуж акьалт тавуна са кьве вацран къене къеледиз ухшар к1валер эцигна, техникадалди фурарни эгъуьна, гьакъидихъ багъ кутаз тунвай къуншиди патав гвай сала эцигзамай  к1валериз вичи керпичир ат1уз, гагь векь ягъиз, гагьни пер гваз аквазвай къуншидин язухар ч1угвазва:
- Вуна ч1угвазвай кьван зегьмет акурла зи жендекди цак ийизва, къунши. Пул гьайиф къвемир, чан гьайиф ша,чан!               


 Эхь, пис яшамиш жезвач зун.  Бахтлу хьана.  Вири хъсанзава. К1валер-йикъарни ак1 туьк1уьрнава хьи,  захъ хьтин к1валер авайбурур туп1аралди гьисабиз жеда.Аяларни са бубат хьанва, итимди абур гъвеч1измаз гена къайгъу авуна, заз дипломни къачунва, са шумуд ц1уд йисуз бес жедай девлетни к1ват1алнава. Мад вуч к1ан жеда, рази я зун зи кьисметдал. Анжах пакамалай няналди вахт акъатзавач,къачузвай багьа къизилар, модни парталар аквазвай касни авач. Ик1 жедач.Фагьумна -фикирна са к1валахал фена к1анда. Виридан арадани жеда, акуна –такуна пенсиядиз фидай вахтни жеда, эхь, эхь са к1валахал фена к1анда. Гьи к1валах хкяда? Гьи диплом хьана вуч я? Вири ч1ехибур юлдашдин танишар я.Ваъ лугьудай садни жедач. Фикирна к1анда. Муаллимвилиз фида. Вучиз? Аялар гьеле мектебда ама, санал машиндаваз тухуда итимди, къе амаз абуруз хъсан къиметарни туьк1уьрна к1анда, пака ЕГЭ-яр кхьидайбурухъни галаз жув гьана хьайила, рахаз регьят жеда.Муаллимвал жедани?
Дарман туш кхьизвай, кьейит1а тахсиркар жедай, бухгалтервал туш, кьилиз т1ални акъудайла,к1вачихъ пулни къведай. Гила гьукуматдин идараярни амач лугьузва, буржар гьалалардай. Исятдин предпринимателриз чпин гьар са кепекдин къадир хьанва.
 Чан таможня! Тум-кьил авачир пул! Гена хъсан хьана таможенникдиз гъуьлуьз атана. Захъ масабурухъ хьиз зегьмет ч1угвадай чан авайди яни? Дамахунар? Ам зи рик1 алай к1валах я. Экуьнахъ гъуьлни аялар рекье туна, ацукь жуваз гуьзгуьдин к1ане,  ягъ рангар,  дегишара булушкаяр,абурухъ кьадай бриллиантрин япагьанар. Хъсан хьана автоматар хьана, я парталар чуьхуьз гужа авач, я къапар!
Хьрак физва зун.Авайвал лугьун,фу за чразвач, къуншийри чразва.Дамахдин парталар алай,гъилерихъни къизилдин цамар галай зун акур абур гьикьван пехилзават1а зал!
Дуьз фикир я зиди. Акурай виридаз зи алакьунар. Муаллимвилиз фида. Тарс тухуз алакьдани? Эхтилатралди,махаралди машгъулардай  тарсарин сятер хкядаман жуваз! Рахаз к1андайди я заз! Аялри, за гьар юкъуз дегишардай багьа,модни парталрин къиметрин кьадарар акъуддалди, а 45 декьикьа акъатда. Вуч?Вацран мажиб 4-5 агъзур я? Гьар юкъуз физ,  сятдин кьведалди ламра кьван к1валахиз? Садра туьквендиз фейила харжзавай пулунихъ та са вацра к1валахиз физ зун гьакьван дарда авани? Ваъ, ваъ, са маса чка жагъурна к1анда. Няни хьуй, итим хтайла, за адал чарасуз гзаф мажиб авай к1валахдин чкадин суракьда хьун  тапшурмишда.