Кукуу цIыкIу

СыщэIэфэ   сэ   сщыгъупшэтэп:
Къутэмабэу, мэзыбэу  мы  дахэр,
Мыщ блэчърэ псыхъо шхъонтIабзэр,
Мы  шъабэу, зэщизэу лэнтIкIуабзэр.

Пхъэшъабэм сычIэтэу сэдаIо:
Кукуур къэкуо, икуо седэIу.
Илъэсэу къысфипчърэр сэлъытэ,
Шъхьасэу къыситрэр сэпхъуатэ.

Благъэу мычыжьэу, мыщ дэжьым,
Мэгуащэ мылъкубэу - пэджэжьыр:
Къысфепчъы илъэсхэр фэдитфэу,
Къысеты, а мылъкур нахьыбэу.   

Ащ благъэу, бэрчэтэу къагосэу,
ПхъэуIур мэуIо, иуIо  къысэIу:
Къысатэ, мэлъытэ ар  псынкIэу, 
Къыситрэр  шIомакIэу  мэгуаIэ.

ГумэкIрэп  кукуур,  ежь  ешIэ,
Шъхьаджи фэшъуашэр афешIэ.
Сыгу илъэу гумэкIыр сылъэплъэ,
Сыгу пагъэу, сыгугъэу сылъэджэ:

Къэкуу нахьыбэу, зымыгъэгус,
Олъэгъуба сфэгуаIэ пэджэжьыр;
Ащ фэдэу къысфапчъэшъ пхъэуIур:
Умышъхьах, адегъашт, ушъхьамыс!

Къэкуу куку, къысэтых илъэсхэр;
Къэкуу куку, сищыIэ  сэ  бэнэу;
Къэкуу сыгу илъынэу, сщымыгъупшэнэу,
Мы дахэу,   хъопсэгъу-нэмыплъэу,
Мы чIыпIэу сигупсэу  сфэмыплъырэр.