Секин я гьуьлуьн кьер..
Секин я гьуьлуьн кьер, авач гьич садни,
Къе вучиз ятIани ичIи я булвар,
Вучиз рагъул ятIа Каспидин ядни,
Пелеш я чилерни, пелеш я цавар.
Къвезмач а лепейрин таниш тир ванни,
Белки лап деринра чуьнуьх хьанватIа?
Гузвач мад эвел хьиз са хабар кьванни,
Яраб гьи патарай дердер гъанватIа?
Кьуд пад акажнава, атанва цифер,
Нисинин бередал алукьнатIа йиф?
Сад садал алчуд жез амазма лифер,
ЧIугвазва белкини ракъарин гьайиф…
Яман агаж хьанва чIехи баобаб*,
Гарари тухванва, аламач цуьквер,
Гъурбатда женнетни тушни бес азаб?
РикIе хер авайдан виле женни хъвер?
Сефил я къе зунни, гьикьван перишан,
Къакъатна яр лугьуз, гуьгьуьлар хана,
Саки тIебиатни, кьуна зун лишан,
Чуькьуьз алахънава, тIамбура** хьана…
_________
* Бакудин булварда Африкадай гъана цанвай тар.
** тIамбура (Ст1ур нугъат) -менгенаяр (литератур ч1ала)
© Copyright: Билал Адилов, 2013
Свидетельство о публикации №113100110614
Свидетельство о публикации №113100110614
Рецензии