Молитва вдовицы за супруга

Владыко Господи, Отче небесе и земли, в вышних живый, и на смиренныя призираяй, милуяй нища и убога, сира и вдовицу приемляй! Ты рекл еси: «Призови Мя в день скорби твоея, и изму тя»; молюся убо Тебе, Отче, услыши печаль мою; молюся Тебе, Утешителю, Душе истины, не остави мене; молюся Тебе, о Иисусе мой Пресладкий, не забуди мене: Ты бо еси плачущих утешение, сирых защита, вдовиц заступление; призри на мя, Пресвятая Троице, в сей день скорби моея и вонми гласу моления моего и слез моих не премолчи. Господи Боже мой! Ты Сам, благоволивый сочетати мя с рабом Твоим, благословил еси нас, во еже жити вкупе, да будем едино тело и един дух, яко друзи и искреннии. Ты дал ми еси супруга, яко споручника, за¬щитника и хранителя, еже жити ми во сла¬ву пресвятаго имене Твоего, но, увы мне грешной и окаянной, зане благословенный союз сей не продолжися: Твоей всеблагой воле угодно бысть взяти от мене раба Твоего и оставити мя едину. Боже великий! Боже праведный! Кому повем печаль мою? Кого призову в скорби моей? Где обрящу утешение? Тебе, Господи, поведаю печаль мою, и на Тебя возвергну ю, к Тебе взываю в скорби моей: Ты бо еси утешение мое, радование мое, упокоение мое, ты еси надежда, не посрамляющая живых и мертвых. Виждь, Сладчайший Иисусе, сердечныя слезы мои, услыши воздыхания мои, и приими, Спасителю мой, моление мое, якоже приял еси вдовицы две лепте. Ты дал ми еси раба Твоего, Ты же и отьял еси: буди ми по всеблагому и премудрому Твоему смотрению, Господи! Но молю Тя, не отними точию от мене неизреченныя Твоей милости; сего ради во умилении припадая к Твоему благоутробию, молю Тя: прости ему, Господи, вся согрешения его вольная и невольная, словом, делом, ведением и неведением содеянная в житии сем, и не погуби его со беззаконми его, но пощади и помилуй ради благости Твоея и не предаждь его вечной смерти, вечной погибели. Аще же беззакония его превзыдоша главу его, молю Тя, Иисусе Прещедрый, Владыко живота моего, даждь ми, смиренней рабе Твоей, время благопотребно молитися Ти неленостно даже до последняго часа издыхания моего за усопшаго раба Твоего, зане верую, яко Ты услышиши воздыхание мое, приимеши моление мое и простиши прегрешения его, отверзеши ему двери милосердия Твоего, якоже отверзл еси я рабу Твоему Феофилу, отшедшему к Тебе, и простил ему прегрешения его по молитвам Святыя Церкви Твоея, внемля молитвам и милостыням супруги его; сего ради молю Тя, приими и мое ма¬лое сие моление и не отрини е от лица Твоего. Господи! Ты Сам рекл еси: «Толцыте, и отверзется вам», — се, стою при дверех ми¬лосердия Твоего, и не престану ударяти, дондеже отверзеши я толкущей ми и воздаси по молению моему. Видя вдовицу зельне плачущу, Господи, якоже бо тогда умилосердився, сына ея, на погребение несома, воскресил еси, сего ради, уповая на милость благоутробия Твоего, молю Тя, Боже мой, сице и о мне умилосердися, Человеколюбие Господи, введи в жизнь вечную усопшаго раба Твоего (имя), о нем же надгробную песнь творя днесь, от всея души моея, от всего сердца моего не престану и всегда вопити Ти: со святыми упокой, Христе, душу раба Твоего, идеже несть болезнь, ни печаль, ни воздыхание, но жизнь безконечная. Аминь.

«Молитвы за усопших». изд. «Развитие духовности, культуры и науки». Москва 2004г.

А это краткие молитвы мамочки Гели после смерти папы Виталия:
Упокой, Господи, душу новопреставленного раба Твоего (имя) и избави его от муки вечные, и пошли ему царствие небесное.
……………..
Со святыми упокой, Господи Иисуси Христе, душу раба Твоего (имя) идеже несть болезнь, ни печаль, ни воздыхание,но жизнь безконечная. Во блаженном успении покой подаждь Рабу твоему(имя) и сотвори ему вечную память.
…………….
Светлая Троица, умоляем тебя отпустить усопшему все согрешения. Аминь.

…………….
Др.молитвы об усопщих:
http://www.molitva.us/Prayer-for-Dead.htm