Яшларгъа

Ватанымыз гузель, тарихымыз зенгин,
Бульбульдай тилимиз, миллетимиз киргин.
Ябанджылар ичюн — биз энъ агъыр зиндан,
Лякин янъы несиль, ах, догъурта иман…

Яшлар — эр бир халкънынъ парлакъ келеджеги,
Яшлар — эр бир халкънынъ солмаз бир чечеги.
Онынъ энъ самимий умют ве ишанчы,
Онынъ ярын ичюн буюк бир таянчы

Ах, динъленъиз мени, янъы несиль, яшлар!
Ах, келинъиз бунъа къол тутайыкъ, яшлар!
Миллий арекетке анълы олып кирген,
Азиз бу курешке бутюн джанын берген,

Джесюр къараманлар сырасына кирип,
Оларнынъ ишлеринъ сонъра девам этип,
Олайыкъ бир Номан, олайыкъ Аметхан,
Я Исмаил киби оджа ве терджиман.

Тек оларнынъ назик гонъюль седалары,
Япкъан бу ишлери, бутюн федалары,
Ах, нафиле олып, атеште янмасын,
Яры ёлда олип, туралмай къалмасын.

Халкъымызнынъ бирлик, деген къазнасыны,
Герайлардан къалгъан байракъ, тамгъасыны,
Юксек гъурур иле къолгъа биз алайыкъ!
Тутып да кетмеге ляйыкъ биз олайыкъ!

Ноябрь 20, 2011 с.