Са мехъерик

Са сеферда са мехъерик
Къалин к1ват1ал рахазвай,
Жегьилари кьуьзуьбрувай
Адетрикай жузазвай.
-Вахтар физва,  жезва дегиш
Чи ацукьун- къарагъун,
Чан бадеяр, т1алабун я
Куь вахтаркай ахъагъун.
Цналдилай тир Угъланагъад
Башламишна эхтилат:
-Халуд  мехъер  юкъуз хьайи
Ахъайда кар , гьакъикъат.
Эвер гайи мугьманарин
Хатур хуьдай хесет тир,
Т1алабай кар, вуч гьар сада,
Кьиле тухун адет тир.
Гъавурдавай зи стхади
Варциз гьахьдай береда,
Ат1угъарна, ч1урна хьиз чин
Къвазна гьанал легьзеда.
И кар акур ч1ехи бубад
Тади гьалда:-хтул, хва
Вуч ават1а лагь ви рик1е,
Кисна къвазмир, буйругъа!
-Къуй атурай баде патав,
Анжах гьадаз лугьуда.
Гъана баде. Зи стхади
Сир бадедив вугуда.
-Гъваш къаршидиз зуьрне, далдам,
Гум алахьрай шишерлай,
Ч1ехи буба кьуна к1ула,
Элкъуьгъ, баде, к1валерлай!
Серсер хьанвай итим к1улаз
Яна бадед чукурнай,
Пагь ат1ана килигзавай
Мирес, къардаш ч1агурнай.
Гурлу капар, хъвер, зарафат,
-Ягъ са макьам,-теклифна,
Баде к1ула аваз буба
Къвазна вилик къекъифна.
Пагь, илигнай Терекмадал
Руг хкатиз к1вачеркай,
Акунач заз мад ахьтин кьуьл,
Карагзама вилеркай.
Пис адетар тергнат1ани
Лугьун за и мехъерик,
Мана авай масабурни,
Кутун хьанва к1вачерик.
Веси я чи, яшлубурун,
Фикир гице адетриз,
Элкъведа гьа, килиг, абур
Вахтар финвай хкетриз!
                Август 2013 йис.