АкI тахьуй ваз, алатнава рикIелай,
Вун дуьнядиз атанвай и хушбахт югъ…
Кан хьанач ваз тебрик кьванни мецелай
Авсиятрин эхир яни, амач гуьгъ?
Вун галайнихъ агакьзавач къе зи ван,
Кхьей чарар элкъвез жувал хквезва.
Саки руьгьда гьатнава са кьерен къван,
Зун хиялрихъ, хиялар вахъ къекъвезва.
Шадвал ятIа ваз масадбур хьун къвалав?
Мурад тушни ви хушбахтвал заз акун?!
Ингье, амма текдик къулан са патав;
Цай туьхъвена, руьхъ кучахьиз ама зун…
Чаравили къай кутазва зи рикIик,
Хабар тушиз къарагъзава мад тIалар…
Сефил я зун, гардан кIирна кваз вилик,
Ви шикилар... чарар... цIарар... стIалар...
Алатнавач рикIелай...
© Copyright: Билал Адилов, 2013
Свидетельство о публикации №113082907085
Свидетельство о публикации №113082907085
Рецензии