У наступны жыццi...
http://www.sunghajung.com/about
У наступным жыцці, на лісце лёсу чыстым,
я хачу паявіцца ў сям’і гітарыста –
ад народзін музыкам – чуллівым хлапечам,
у якога істота, як рэха, трапеча.
У якога істота, як рэха, трапеча,
кожны раз, як вяртаецца бацька пад вечар
і кранае гітару, і моцныя рукі
рассыпаюць над струнамі дзіўныя гукі.
Рассыпаюць над струнамі дзіўныя гукі,
што люляюць калыску малечы-сынулькі
незвычайна прыгожай начной калыханкай,
што віецца між сценаў пакоя да ранку.
Што віецца між сценаў пакоя да ранку,
а пасля растае, нібы ноч на світанку,
ды навек застаецца святым успамінам
ва ўспрымальнай душы паслядоўніка-сына.
Ва ўспрымальнай душы паслядоўніка-сына
нараджаюцца мары – жывыя карціны,
як у ручках яго заспявае гітара –
і напоўняць прастору мелодыі чары.
І напоўняць прастору мелодыі чары,
і раскрыецца талент, атрыманы дарам
і агранены працай і прагным імкненнем
так іграць на гітары, каб плакалі цені.
Так іграць на гітары, каб плакалі цені –
прафесійным дуэтам з музыкам-натхненнем…
Мне б калісь нарадзіцца і стаць гітарыстам –
у наступным жыцці, на лісце лёсу чыстым.
5.05.2013
http://www.youtube.com/watch?feature...&v=Hjm1-fHeUQ8
http://www.youtube.com/watch?feature...&v=uvW73uG4LJE
Свидетельство о публикации №113050504180