Гагь на зун шадарна, гагь чилиз гьайна,
Гагь цавал акъудна, гагьни акайна,
Гагь лувар кутIунна, гагьни ахъайна,-
И дагъдин лекьрекай чIагъ хьуй лагьана?
Гъед хьана, гъед я вун, заз нур гузавай,
ЦIай хьана, цIай я вун, руьгьда кузавай,
Бес вучиз яр туна, икI хъукъузавай,
Гьеле фад я адаз, тагъ хьуй лагьана?
Ша, вуна чуьнуьхмир, лагь, вуч я къарар,
Ракъурмир зи патахъ тегьнедин чарар.
Вегьизва зал вуна ял тежер парар,
Ашкъидин чуьлдикай багъ хьуй лагьана?
КIанивал зун патал кукIуш я кьакьан,
Хвешивал - гьижрандин, байихрин макан.
Хуш яни эцигун хирен винел къван,
КIанидан рикIел са дагъ хьуй лагьана?
Масади авач захъ, вун я заз кIани!
Чидач, кьатIузвач жал яраб вунани?
Къакъатиз жезавач завай сакIани,
Вун галай йикъариз сагъ хьуй лагьана.
Вун галай йикъариз сагъ хьуй лагьана...
© Copyright: Билал Адилов, 2013
Свидетельство о публикации №113032312550
Свидетельство о публикации №113032312550
Рецензии