Кlандач заз и дуьнья вун галачир,
Иштягь къведач суфрадихъ вун алачир,
"Вун зи яр я"-ачух ийин за ваз сир,
Вун дидеди чарадаз гун тавурай.
Ашукь жеда вал акунмаз жегьилар,
Пехил я вал хуьруьн бязи гуьзелар,
Зарул мийир на шаирдин гуьгьуьлар,
Вун дидеди чарадаз гун тавурай.
Хуш я рикlиз ви бухах заз бинедлай,
Гаф це атlай милайимдиз мецелай,
Элкъуьра кас вун кlанз атай-гъенелай,
Вун дидеди чарадаз гун тавурай.
Чи ашкъидиз кlусни къимет тагана,
На шаирдин михьиз умуд атlана,
Владиказ гудайди я-лагьана,
Вун дидеди чарадаз гун тавурай.
Ви иладрихъ галаз пака рахада,
Ви стхани кlвалахал за аквада,
Мехъер план къениндалай чlугвада,
Вун дидеди чарадаз гун тавурай.
Сегьер-сегьер вун булахдал экъечlда,
Хъуьрез,рахаз хупl дамахдал къекъведа,
Зи муьгьуьббат анжах са ваз хъуьреда,
Вун дидеди чарадаз гун тавурай.
Вун дидеди чарадаз гун тавурай!
© Copyright: Владик Батманов, 2013
Свидетельство о публикации №113021306425
Свидетельство о публикации №113021306425
Рецензии