Варцарал жед бубад кlвале,
Пагь,дамахар жедай рикlе,
Гъуьлуьн диде твадай хъиле,
Де ихьтинди свас жедани?
Гафунилай хъел хъведай,
Гьарагъайла тадиз шедай,
Шикаятдив ви кьил недай,
Де ихьтинди свас жедани?
Мугьманд чина пис рахадай,
Гъуьлуьн крар бед аквадай,
Кlвале даим къал твадай,
Де ихьтинди свас жедани?
Вичик зерре намус квачир,
Акьул кьиле гьич авачир,
Кlвалин кlвалах кlусни тийир,
Де ихьтинди свас жедани?
Хизандилай пис рахадай,
Чарадакай арха кьадай,
Дидедин гаф тадиз хадай,
Де ихьтинди свас жедани?
Нисинал жед чими мисик,
Къарагъда кваз цlакул кьилик,
Гьамиша сив галай тlуьник
Де ихьтинди свас жедани?
Де ихьтинди свас жедани?
© Copyright: Владик Батманов, 2013
Свидетельство о публикации №113021306141
Свидетельство о публикации №113021306141
Рецензии