Дегиш хьанва пара затIар

Хабар къазва на шегьердин гьаларикай,
Дегиш хьанва ина пара затIар, Эйваз.
Рахадани зи руьгьдавай къаларикай,
И патара вуч аватIа чир хьурай  ваз.

АскIан кIвалер амукьзавач, кьакьан жезва,
Амач Баку, заз-ваз чидай а тегьерда,
ЧIанавилер амма яман дакIан жезва,
Инсанрин тIул дегиш хьанва чи шегьерда.

Им базардин мадарат я, лугьуз сада,
Багъри тирдан бегьердин  тар агъурзава,
Какахьнавай вири санал  и арада,
Гишинда фу, тухдани бахт жагъурзава.

Пул паталди  парабур жез мидагъаяр,
Сада  касвал  маса гузва,  сада дустар,
Кьери  жезва инсанвилин къадагъаяр.
Кьит хьана хьи  саф ниятар, михьи къастар.

Сад гьатнава  начагъвиле,  лап гъед хьана,-
Залай гъейри мад зарияр амач, лугьуз,
Вичи кхьиз, вич тарифиз алахънава
Шит акъудна, садахъни кьел кумач, лугьуз.

Садни  чинал  ваз  хуш рахаз, хъуьрез ава,
Амма кьулухъ кIукIварзава, ялав галаз.
Гьар гафуна са ягьанат, мерез ава,
Какадарна  лацудини  чIулав галаз.

Четин я заз  и  крарай  акъудун кьил...
Са  меслят це на, шаир, вуч ийин  лагь?
ГузватIани тIем  кхьиниз, къакъажна гъил,
Лугьун за  ваз, галатнава  Билал  Далагь.
   5.01. 2013