Мумкин яни?
Гила геж я, чи уьмуьрдин хьанва пай-
Лагьана заз, кьил агъузна вуна къе,
Чи карванар элухъарна, фенва цIай,
Амайди тек са гелер я и рекъе…
Амукьин чун дустар хьана гьар чIавуз-
Ви гафар зи акъатзамач япарай.
ХкведатIа йикъарикай са юкъуз,
Акъатна мад ашкъи вичин къапарай?
Физамач зи вилерикай а вилер,
Килигзавай эхиримжи сефер хьиз…
Кандай хьи заз са легьзеда а гъилер,
Алчуд хьана зи гардандал, кифер хьиз!
Жедани цIай чинеба хуьн, каниди?
Бес кан яз-яз чара гьикI жен, каниди?
Ихьтин ашкъи - атIудай къен, каниди,
Мумкин яни тикрар хъжен, каниди?!
© Copyright: Билал Адилов, 2011
Свидетельство о публикации №111081403932
Свидетельство о публикации №111081403932
Рецензии