Начныя павукi
Нас загрызуць начныя павукі.
Абачліва-нябачныя стварэньні,
Не пакідаюць шораху і ценяў,
Вылазяць ціха з хованак штоночы,
Каб запаўзці ў галовы нам праз вочы.
Мазгоў недасканалых рэвізоры
Нас дажыраюць якасна і спора.
Іх часам шпацыруе да халеры
Бульварамі зьнясіленых артэрый,
Гуляюць па крыві і пэўна мараць
Стварыць для нас сцэнарыі кашмараў.
І ў глуханоч павуччая пяхота
Аднойчы склеіць скуру ліпкім потам,
А сэрца разьляціцца, як лушпіньне,
Спавітае сьмяротным павуціньнем.
Як крыўдна ведаць гэта, мужыкі:
Нас загрызуць начныя павукі.
2010.
Свидетельство о публикации №110050603796