Эр шей кече бу дюньяда:
Сувлар къуруй кенъ дерьяда,
Къуруй козьяш тёккен козьлер,
Юрек къыргъан, аджджы сёзлер.
Кече боран, кече агъры,
Ёрулмайып этсенъ сабыр.
Ягъмур токътай, кунеш чыкъа
Ве къапуны севги къакъа.
Кече бир кунь джан агърысы,
Терен олса да ярасы,
Шенълик иле толса омюр,
Темиз, ачыкъ олур гонъюль.
Къанатланыр, кокке учар,
Къара булутлардан къачар.
Душманларынъ тютеп янар,
Атешинден пишип къайнар.
Къара куньден келир беяз
Ве къоркъутмаз ич бир аяз,
Омюр бахт антерин киер,
Айдын куньлер ерге тиер.
Шенълик иле юрек тояр
Ве шу вакъыт коклер бояр:
Булутларны беяз тюске
Темиз, шеффаф, бархут феске.
Апрель 16, 2006 с.
Эр шей кече
© Copyright: Эльмара Мустафа, 2010
Свидетельство о публикации №110040800158
Свидетельство о публикации №110040800158
Рецензии