Къекъвезва кьил тик яз, накъвар чуьнуьхиз,
Къалуриз вичи-вич бахтаварди хьиз…
Гьазур я гьар са гъам, хажалат эхиз
Тек амай тават.
Ахъайнач садаз рикI, ганач садаз сир,
Лап жегьил чIавалай-гьиссерин есир...
Чидач, вуж батIул я, нинди я тахсир,
Тек амай тават?
Кьунани гьар чIавуз вине такабур,
Алахъна чешне гуз хуьналди абур,
Лагь, ацIанвачни бес, гилани сабур
Тек амай тават?
ТуькIуьриз кIан хьанай ваз уьмуьр жуван...
ГьинвайтIа а кьегьал, а лацу балкIан…
КIвалин гьавани ваз такIан я, такIан,
Тек амай тават.
Авани ви къене азабрин хара?
Секинвал жезва са верцIи ахвара...
Йикъар акъатзава кIани махара,
Тек амай тават.