***
Чапмайма ырысхы ызындан,
Жашауум керек затны берир.
Излемейме къуллукъ, къызына,
Табар не да кесини жерин.
Мени ючюн жанын берлик жокъ.
Аман, ахшы тюйюлме сизден,
Жыкъса бирде ёлюм деген окъ,
Кетерме мен, кюйюп, эследен...
Кетмезликле жокъ, ёлмезликле,
Ары кетген къайтмайды артха.
Мени къоюп, мен жан берликле
Салгъандыла жолла ахыратха.
Тёздюм кёпге гюняхлы жерде,
Кечелерим ёте жукъусуз.
Жарлы башым тарта телиге,
Бола келдим кёп кере онгсуз.
Билдирмей жюрек ачыуларын,
Кимге керек дей къайгъыларым,
Терслемей жашау алдауларын,
Излейме шаудан тагыларын.
Жангы кюнню болсам башлардан –
Таза солуу алып аладан,
Халаллыкъ да алып тауладан.
Ансыз къыйын жерде жашагъан.