Азархана акур тегьер-
Рик1яй агъуз селлер фена,
П1узаррилай алатна хъвер,
Аман квахьиз эвер фена.
Я чан Аллагь! Ийиз сабур,
Ваз балаяр дак1ан яни?
Жегьилвилин кьат1из абур,
И алай гьал хъсан яни?
Чан аламаз тухуз, туна
Жегьнемд кьула, тахсир вуча?
Диде-буба кефсуз туна,
И девирдин эхир вуча?
Гьалч авуна суфатдал хам,
Намус, гъейрат кьарадавай
Зирзибилдин хьанва аям,
Лайихлувал къарадавай.
Лугьуналди хийир авач:
Кьисмет лугьуз ацукьнава.
Къал-макъалдин эхир авач:
Гьаясуз сар алукьнава.