Шаир хьана кiанда

ШАИР ХЬАНА КIАНДА

Шаир хьана кIанда халис жерягь кас,
Гьар са тIалдиз дарман авун рикIеллай.
Вич паталди тIимил авай темягь кас,
Ажиз касдиз гъил хкажиз рекьеллай.

Шаир хьана кIанда, шиир гафарал,
Руьгь кутадай, чан алай хьиз рахадай.
РатIра авай къуьл михьдай хьиз юрфарал,
КIвалахдай, гьекь авахьна физ чухвадай.

Шаир хьана кIанда, хъсан чIал чидай,
Гьар са гаф дуьз ишлемишдай къашар хьиз.
Жерягьдиз хьиз, азарлудан тIал чидай,
РикIера лув гуз вердиш тир, къушар хьиз.

Шаир хьана кIанда, чидай тарихар,
Гележегдихъ фин патал рехъ къалурдай.
Михьи кIвалах ийиз, квачир синихар,
Регьчт рекьер, дуьз тир рекьер жакъурдай.

Шаир хьана кIанда, лугьун - регьят я.
Лагь, Сажидин, хьанан валай алакьиз?
Устадвилин рекьер, гьелбет, кьегьят я,
Хьун паталди уьмуьр физва алахъиз!