Вун кьвед лагьай хва я зи,
Ажайиб тир тIвар алай.
Аллагьдилай я рази,
Хва жеда вун, кар алай.
Яхунвилиз килигмир,
КIарабар лагь, сагъ хьурай.
Чарадал вил эцигмир,
Къуй дуьнья ваз багъ хьурай.
Пехилрикай хъел къвемир,
Алчахбурухъ кьил кьамир.
Дуьз рекьелай элкъвемир,
Дустун кефи на хамир.
Кьилел ала Сад Аллагь,
РикI михьиз хуьх хуравай.
Вуч кIандатIа, Гьадаз лагь,
Емиш кIан хьухь таравай.
Яшар хьунвай, акьулни
Къведа, хва, ваз чаз хьтин.
Лугьудайвал, сагъулни,
ЦIини дуьз твах, шаз хьтин.
Диде амач лугьумир,
Я бубани рекьидач.
Алчахдан гаф къачумир,
Рагъ, циферик рекъидач. -
Дидедини бубади,
И дуьнья заз багъишна.
Жув къе яшдиз зурбади
Хьуналди за алхишна.