КIантIа, Агъа, Кьулан, Вини-СтIалдал,
Мугьман хьана, ялар ягъа хъсандиз;
Экуьн кьиляй чигер гьар са стIалдал,
Алаз акун, бахт тушни кьван инсандиз?
Хкаж хьана, кьакьан тир са синтелай,
Тамаш Шалбуз ва кьакьан Шагь дагълариз.
Къакъажнавай саягъ гътлер кьуьнтелай,
Тамашзавай арандавай багълариз.
Рагъ экъечIдай чIавуз, цавун кIан кьуна,
Яр экъичда, кьуд патахъди чилерал.
Ракъини вич и алемдин хан кьуна,
Ишигъдин нур экъичда куьн кьилерал.
И пуд СтIал, бине кутур ксариз
Рагьмет хьурай, чаз и хуьрер багъишай.
Вил вегьейтIа, шумуд асир йисариз,
Багъдат дере аквада экв экъичай.
Садра атай чIавуз и пуд СтIалдал,
Мукьвал, мукьван хквен хъийиз кIан жеда.
Рычал-Суяр, тIуьнар, хъунар столдал,
Киш-кабабар, яр-емиш куьн чан жеда.
СтIалрилай тамаш кьакьан цавариз,
Югъуз – рагъ, варз, кисна вичин рехъди физ.
Куьн атай чIав элкъведа са сувариз,
Гъетерин луж аквада квез гьар йифиз.
Чи Куьредин, амай лезги хуьрерин
Тариф авун кутугнава рикIивай.
Камаллу тир халкьар, дерин сирерин,
Къакъуд тежер ксар я дуьз рекьивай.
Сажидиназ кIандач кьуру тарифар,
Аламатар аквада куьн вилерал.
Татайбуру, чIугваз жеда гьайифар,
Ихьтин хуьрер алайди туш чилерал!