Зи жигъир

               
Къекъвезва зун мад са сефер жигъирдай,
Жугъун кьунвай жик1ийрини къвакъвайри,
Цацари кьаз ахъайзавач есирдай:
--Акъваз, килиг, гьик1 лув гузват1 дурнайри.

Хъуьрезвай рагъ галукьна нагъв къиткьинай,
Вилери зи  мирги гъалар кьат1узва,
На лугьуди,гару гимишд  киткинар,
Чализ, кьАт1из кьат1ар гьарнихъ тухузва.

Ингье, ала, п1ип1ин хьтин таварин,
Серк1верал, кьил хкажнавай валаркай,
Пешерални ярк1и патан рангарин
Гибе храз авахьзавай тараркай.

Геляна цен цагъамдихъай физвай зун
Мад къах жезва, ван хьайила ширширдин,
--Хъван са капаш,сагърай, чешме-булах вун,
Ацукьда яб гуз манидихъ ничхирдин.

Алгъанмазди, серсер хьана амукьна,
Къарникъузрин тажар жерге акурла,
Элкъвена кьил, ни атирлу  галукьна,
Къиб ягъай векь инихъ-анихъ авурла.

-Гуьт1уь жигъир, куьгьне таниш, хелветдиз
Алхишзава за ви гежен цуькверал,
Икрамзава багъишзавай девлетдиз,
Ашукь хьанвай галгам кьунвай хилерал.

Мере, ч1ухлумп1, мертер, жик1и, къвакъваяр,
Инияр- гьар сад дарман я, дава я.
Т1ебиатди сих авунвай араяр,
Зи жигъир заз зулухъай вун ала я.

Ават1ани рекьер шегьре патарив,
Къуват ава вахъ суьгьуьрдин галч1урдай,
Сейриз тадай рахаз къалин валарив,
Берт юзуриз, рази жезвай хатурдай.




Октябрь 2011 йис