ТРЫВОЖНАЯ АСАКА
Леанід Пранчак
Бяссоных начэй мальба.
Трывожная асака.
Ты гнуткая, як вярба.
Ты хуткая, як рака.
Закружыцца галава:
Дзе праўда, а дзе мана?
Ты ціхая, як трава.
Ты звонкая, як струна.
Спакуслівая краса.
І вочы твае, і стан.
Ты хітрая, як ліса.
Ты дзікая, нібы лань.
Лаўлю твой юрлівы рот,
Цалую пяшчотна скронь...
Ты золкая, нібы лёд,
Спякотная, як агонь.
Салодкая, нібы грэх.
Жаданая, як вада.
І хто ты: сляза ці смех?
Ратунак альбо бяда?
07.08.2021