Руьгьдай аватмир!

 
Гуьгъуьна рахада  алайди кьве чин,
Къаст кьуна  гьисабун  хийирар вичин.
Яд цунал ацIудач  кIан квачир гичин-
Руьгьдай аватмир!

Ялтахда тарифрай, вун яргъал акъваз!
Гьахъдан тегьнейрикай  хъел татурай ваз,
Фашалвал хас жедач лукIвал такIандаз-
Руьгьдай аватмир!

Жуванда жувандан къен  кузва лугьуз,
Багъридан  рекьера чил цузва лугьуз,
Чарадан чекмедиз мез гузва лугьуз
Руьгьдай аватмир!
 
Аданди хиянат, гьа  кIвач галкIурун,
Гьардал са къван вегьин, лакIаб алкIурун,
Пехилдан  хесет  я  умуд чукIурун-
Руьгьдай аватмир!

Масда* тухузватIа мукашди гъери,
Ламувал гудани  прунздиз хири?
Тарихди кутада къайдадик  вири-
Руьгьдай аватмир!
*мас-къимет