БЕЛАРУСІ КЛЯНОВЫ ЛІСТОК
Леанід Пранчак
Я на глобусе школьным прыкмеціў
І зрабіў адкрыццё незнарок,
Што мая Беларусь на планеце,
Як зялёны кляновы лісток.
Я ўсе сцежкі твае перамераў,
Па азёрах тваіх вандраваў.
Я табе, Беларусь мая, верыў.
Я цябе, як матулю, кахаў.
Да цябе, белы край запаветны,
Пупавінай прывязаны я.
Небасхіл неабсяжны і светлы.
У жытнёвых палетках зямля.
Кружыць бусел па-над паплавамі.
Неба сінь адбівае ставок…
Зеляней маладымі лясамі,
Мой зялёны кляновы лісток.
Я хачу табе шчаснае долі.
Цёплых дзён і лагоднай зімы.
Каб пад роднаю хатай ніколі
Не гучалі нядолі грамы.
Бескарыснай любові патрэба
Накіроўвае кожны мой крок.
Дай жа Бог табе чыстага неба,
Беларусі кляновы лісток!