Вилик квай юкъуз чи багъда векьер ягъдайла, зи уьмуьрдин юлдашди векьерикай са къужахдавай бубуяр хкудна къерехдал, тарцин кlаник эцигнаваз акуна заз- чуьлдин цуькверал зи рик1 пара алайди я! Кьакьан къацу махпурдин танарал гьеле цуьквер алачир - абурал пара ири кlумпар алай. Цуьквер ахъайнавач лугьуз, бубуяр низ чир жедач кьван! Зани тадиз и къужах цуьквер хкана чи айвандик эцигна. Экуьнахъ лагьайтlа, зун яру чlагай бубуйри вилив хуьзвай. Заз акьван шад хьана и яру кlунчl акурла! Инсан тушни, са затl акурла, пара вакъиаяр рикlел хкведа! Икьван иер кlунчl акурла, зи рикlел аял вахтар, чун, дуст-рушар, бубуяр кlватlиз гьик1 фидай хтана. Ахпа зи рик1ел бубу Европада кьетlен, виридаз чир жедай цуьк тирдини хтана. Бубу, са патахъай, ана иер цуькверикай сад яз хсабзава, муькуь патахъай лагьайтlа, бубу - дяведин гуьлледи чилел тунвай аскердин ивидин гелен ярж хьизни хсабзава. И ярж дявейра пуч хьайи вири аскеррин гьуьрметдин, абур рикlел хуьнин яржни я ва гьа чlавуз инсанриз: "Мад гьич садрани дявейрин зулумар тикрар тахьурай!"(Never Again!) - лугьузвай эмирни...
Накь чна Гъалибвилин югъ къейдна, дяведин цlай хтай ветерана, гьайиф, гьар йисуз тlимил жезва, абурун кьадар са гъилин тупlарал гьисаб жеда - районра сад-вад я амайди. Амма алай девирда гьалтзава са инсанар, абурун арада жегьилар ава, тарихдин чинриз лайихлу къимет тагузвай, гьайиф хьи, аслу тарих вич чин тийизвай. Гьа икl зун бубуйрин вилик ацукьна хияллу хьана. Зун абуру мад жуван фикир тикрар авуниз мажбурна.
«Зал чан аламай кьван, зи рикlелай а дяведа чпин уьмуьрар чи ислягьвал патал, жегьилзамаз, гайибур, дяведин цlа пуч хьайибур алатдач! Зи хажалат абурухъ - гьар садахъ я! Гьар садахъ за гьайифар чlугвазва! Жувавай жедай вуч хьайитlани, за ислягьвал патал ийиз алахъда!
Жува тарс гузвай аялриз, лекция кlелдайла - студентриз, жуван хтулриз мукьвал-мукьвал ветеранрикай, дяведин чинин алчахвиликай, дяведин чlулав, тух тежедай невсиникай суьгьбет ийида.
- Къуй дявеяр мад тахьурай! Гьар са диде, буба чпин балайрин далудихъ сагъ яз хьурай! -
За и гафар мадни ва мадни тикрарзава.
Камаллу Тlебиатди лагьайтlа, гьар гатфариз яру бубуйралди хайи чилин никlер чlагуриз, чи фикирар чпел желбиз, дяведин йисар, яру аскерар чи рикlел хкида.
10.05.21