ХАЙИ ЧIАЛ

    
Сур гелер тарихдин, къванцин кхьинар,
Девиррин эменни, руьгьдин хазина,
Лигим я халкь патал даим женгина-
Хайи чIал!

Ватандин гьар са чIиб азабар акур,
Душманар юзурдай Шарвилидин тур,
Мердвилин чешне тир Давудан гапур-
Хайи чIал!

КьепIин пак баядар, бадедин махар,
Йифен верцIивилив ацIанвай ахвар,
РикIерай рикIериз - шир-шир булахар-
Хайи чIал!

Няметан цIарарин ялав, цIайлапан,
Миливал шиирдин Етим Эминан,
Ятар гуз, тавакъу тийизвай Кьулан -
Хайи чIал!

Чирагъ я–виридаз рехъ къалурзава,
Гьар са гьарф са гъед я дигедин цава!
Цуькверин атирар – нугъатрин навар-
Хайи чIал!

Кьакьанвал суварин, берекат чилин,
Секинвал таквазвай лепеяр гьуьлуьн…
Дамахдин ишара, винизвал кьилин-
Хайи чIал!