Туьхуьриз тадач за рикIерин ялав,
Галатдач гуникай гьиссериз къилав.
Цал жеда зун вилик дердерин чIулав -
Байихда вуна.
Эхдач за чаравал - кьабулдач жаза,
Ви тандиз гьар чIавуз къуват гуда за.
Зулумат рекьера эквер куда за,
Байихда вуна.
Ваз чими чIавара мадни къведа зун,
Ракъинин нур кьадай цифер жеда зун,
Гьижрандиз вуч ийин - йифер жеда зун!
Байихда вуна.
Чиг хьана ваз кIани экуьн ярариз,
Фида зун вахъ галаз дагъдин хурариз,
Элкъведа легьзеда мили чIурариз,
Байихда вуна.
Яд кIанда? - Булах хьиз вилик жеда зун,
Гар я зун чIарарал-кьилик жеда зун,
Эверун герек туш, гъилик жеда зун,
Байихда вуна.
КIурукIар хьайила гатфарин тарцел,
Чубарук хкведа, акъата варцел,
КIанидан руьгьдин тIал, гурарин кIарцIел
Байихда вуна.
Чепелукь хьана зун, ацукьда хурал,
Ви рехъ акъатайтIа садра зи сурал,
Тан квахьда, рекьидач амма кIанивал! -
Байихда вуна.
Б.А. 14.09.2020