( сонет)
Вуч хьанва, мад руьгьда авани тIалар,
Секинвал чин тийиз, чкIиз кьуд патаз?
КIентI хьтин уьмуьр я, какахьна гъалар-
Гьич кьилер жагъуриз кIанзамачни ваз?
ТакIанвал акуна кIани вилера,
Лагь, чанда, дамарда иви къанвани?
Тахайвал кьатIана хайи хилера,
Гьулдан акIаж хьанвач, амма… ханвани?
Гапурди кукIварна, азабри кьуна,
Захадиз ахъа тир са рикIин варар…
Бес я, бес я гила, цамир мад вуна,
Къадир авачирдаз къадирдин тарар…
ЧIалахъ туш, йисари сагъардач хирер,
Абуру чирда ваз эхунин сирер...
Б.А. 26.07.20