Яран сувар мубарак!

   
Ингье, къацу жезва дагъларин хурар,
Ракъинин нурариз хъуьрезва чIурар,
ТIебиат уях я, кутазва лувар-
Вилиз хъвер, чиниз нур, кIвачиз звер гурай,
Квез яран суварар мубарак хьурай!

Суфрадал мехкуьтI, тIач,  чичIидин цIкан,
ИситIа, натIуфа нез аялрин ван,
Бахтавар жедайвал гьар садан хизан
Гатфари кIвалериз берекат гъурай,
Квез яран суварар мубарак хьурай!

Акъатна майданрал- кефияр кIубан,
ЦIаярал алтуграй Куьрени Къуба,
Хъелбурув кIватI хьана ийиз гун туба,
Къенин и шад юкъуз вири туьхкуьрай,
Квез яран суварар мубарак хьурай!

Къвердавай бул жеда суварин паяр…
Тахьурай руьгьера саврухар, къаяр,
Мехъерриз элкъуьрай къенин хунчаяр,
Жегьилриз бахтуни лампаяр курай,
Квез яран суварар мубарак хьурай!